وخداني فين يابني قصه كامله
بتلم ليه الهدمتين والطرحتين والشبشبين ؟
ماتقوللي يا ابني واخدني فين؟
علي بيت جديد؟
ما أنا ليه بيت هو أنا يا ابني اشتكيت؟
مش عايزه يا ابني بيت جديد
البيت ده أنا عشت فيه خمسين سنه
ما اعرفش غيـــره أي بيت ؟
وقعدت فيه لمّا أتحنيت
مين اللي قال أنا عاوزة بيت
أسأل بلاط الأرض ؟
وأسأل كـــل حيــط مش عايزة غيره أي بيت ؟
أنا عشت يا ابني سنين هنا ..
وأتمنى أموت برضك هنــــا
أفتح عينيه كل يوم وأقفل عينيه كل يوم
علي أيد أبوك بتضمني ف صورة الزفاف
بتدفي قلبي وتحضنه ف سنين عجاف في الأوضه دي
أنا لسّه عايشه ويّا أبوك عمري اللي فات أصل الحبايب لوسابوك،بيعيشوا فيك بالذكريات ..
خليني يا ابني ويّا أبوك أصحي وابات واشم ريحته في الحاجات وأعيش معاه باقي الساعات
لسّّّه البدل جوّه الدولاب جنب السرير أخر كتاب
نضارته أهي وعبايته أهي ولسّّه سجادة الصلاة..
والسبحة فوقها منـــوّره ف سنين عجاف
ولسّّّه بااسمع ضحكته وسط السكـــــــات
أنا عايشه يا بني بحاجة أبوك متونسـه
وأنا عارفه يا ابني،إن خدتني البيت الجديد رايحه أتنســي.
وأنا يا ابني مش عاوزة أتنسي ؟
فإن كنت محتاج الوســع لأجل العيال؟
هات العيال أنا عندي يا ابني سرير كبير
هاارقد علي حرف السريــــر وحاسيب لهم باقي السرير
خد السريـر إن شالله أنام فوق الحصير
لكن أنام وسط الأمـان !
خليني يا ابني ف وسطهم قدّرني (واحده) منهــــم
أصحي وأبات على حسهم باقي الزمان ..
وماهوش كتير ؟
صدقني يا ابني ماهوش كتير !
ولا نفسي أعيش بعد اللي شفتــه
كمّّل جميلك واستر الباقي في حياتي
أنا عمري يا ابني قصاد عينيك ..
فرّطت في أمي أو حماتـي؟
إن كان ده مني ف يوم حصل أنا كنت أقول باخد جزاتي
ما تقوللي إيه خلاني يا ابني أهون عليك
وساحبني ويا الهدمتين رايح تسلمني بأيديك
فرطت ف امك قوللي ليه
أنا عمري يوم فرطت فيك
وإن كان علي ضيق المكان
ما أنا قلتلك خد السريـــر !
وإن كان علي ضيق المعيشة
أبوك سايبلي معاش كبير قسمته يا بني من زمان
النص ليك والربع مصروف العيال والباقي مصروف الدواء
لكن خــلاص عايشه وحياة عينيك ما عاد حايلزمني الدواء
خد المعاش كل المعاش !
لكن بــلاش أحس إن ربايتي فيك راحت بـلاش
اللهم ارزق والدتى الجنه
